Meer oor ons...

AHI Bloemfontein het in 2007 tot stand gekom nadat 'n aantal besorgde sakepersone van Bloemfontein spontaan gesprek begin voer het om te besin oor die vraag of die sakesektor nie méér kan doen om die groei en vooruitgang van ons stad en streek se ekonomie te help bevorder nie. Tydens hierdie gesprekke het dit gou duidelik geword dat daar 'n sterk behoefte by baie sake-ondernemings met 'n eiesoortige sakekultuur in ons stad bestaan om gereeld met mekaar gedagtes te wissel oor sake van gemeenskaplike belang. Daar was 'n duidelike gevoel dat daar ruimte in ons stad is om, aanvullend tot die reeds bestaande sake-organisasies, 'n forum te hê waar sakemanne en vroue tuis en op hulle gemak sal voel en openlik en vrymoedig debat sal kan voer en gedagtes kan uitruil oor die nuwe uitdagings waarvoor hulle te staan gekom het. Uit hierdie inisiatiewe is AHI Bloemfontein op 6 Februarie 2007 gebore.

Die hoogste gesag in AHI Bloemfontein berus by die Algemene Jaarvergadering van al die lede. Tussen die AJV word die sake van die kamer bestuur deur 'n uitvoerende komitee, bygestaan deur 'n dagbestuur wat uit die vier ampsdraers van die Kamer bestaan.
 

Kontak ons gerus indien u meer inligting verlang